Нархлар Макроиқтисодий ва ҳудудий тадқиқотлар институти (МҲТИ) мутахассислари томонидан таҳлил қилинди.
2024-йил октябрь ойида иккиламчи автомобиль бозорида Lacetti, Damas, Labo нархлари пасайишда давом этди. Бу Макроиқтисодий ва ҳудудий тадқиқотлар институти (МҲТИ) мутахассислари томонидан таҳлил қилинди. Таҳлил натижасига кўра, Spark’нинг ўртача нархи бироз кўтарилган бўлса, Cobalt ва Nexia нархларида деярли ўзгариш кузатилмади.
Маҳаллий оммабоп автомобиллар
Жорий йилнинг октябрь ойида иккиламчи бозорда кўп фойдаланган Lacetti, Damas, Labo автомобилларининг ўртача нархлари сентябрь ойига нисбатан мос равишда 1,5 фоизга, 6,3 фоизга ва 2 фоизга пасайган. Шунингдек, ўртача фойдаланганининг нархлари мос равишда 0,3 фоизга, 0,6 фоизга ва 3,5 фоизга арзонлашди. Кўп фойдаланилган Spark автомобилининг ўртача нархи 2,2 фоизга, ўртача фойдаланганининг нархи 2,9 фоизга ошган бўлса, Cobalt ва Nexia нархларида сезиларли ўзгариш кузатилмади.
Октябрь ойида таклиф қилинган ўртача нархлар Lacetti автомобилининг кам фойдаланилгани учун ўртача нарх $15,2 мингни (сентябрда $15,4 минг) ташкил этди, кўп фойдаланилгани эса $13,3 мингни (сентябрда $13,5 минг) ташкил этди.
Damas автомобилининг кам фойдаланилгани $8,25 мингга (сентябрда $8,3 минг) баҳоланган бўлса, кўп фойдаланилгани $7,5 минг (сентябрда $8 минг) нархларда таклиф қилинган. Spark автомобилининг ўртача фойдаланилган варианти $10,5 минг (сентябрда $10,2 минг), кўп фойдаланилгани эса $9,2 минг (сентябрда $9 минг) атрофида таклиф қилинган.
Маҳаллий люкс автомобиллар нархи
Жорий йилнинг октябрь ойида маҳаллий люкс автомобилларидан Equinox нархи сезиларли ўзгарган бўлса, Malibu ва Tracker нархлари деярли ўзгаришсиз қолди. Ушбу даврда кам ва ўртача фойдаланган Equinox’нинг ўртача нархлари сентябрь ойига нисбатан мос равишда 1,5 фоизга ва 6,3 фоизга арзонлаган бўлса, кўп фойдаланилган автомобилинг нархи 1,9 фоизга ошди.
Октябрь ойида кам фойдаланилган Equinox учун $33 минг (сентябрда $33,5 минг), ўртача фойдаланилгани учун $30 минг (сентябрда $32 минг), кўп фойдаланилгани учун эса $27 минг (сентябрда $26,5 минг) нархларда таклиф қилинган.
Электромобиллар нархлари
Жорий йилнинг октябрь ойида электромобиллар нархи сезиларли даражада арзонлашди. Хусусан, кўп фойдаланилган BYD Han автомобилининг ўртача нархи 10,2 фоизга, ўртача фойдаланганининг нархи 2,6 фоизга, янгиcининг нархи эса 2,2 фоизга пасайди. Ўртача фойдаланган BYD Song Plus EV Champion’нинг нархи 7,5 фоизга, янгиcининг нархи эса 1,2 фоизга арзонлашди. BYD Han автомобилининг кўп фойдаланилган варианти учун $31,4 минг (сентябрда $35 минг эди), ўртача фойдаланилгани учун эса $37 минг (сентябрда $38 минг эди) нархлар таклиф этилган.
BYD Song Plus EV Champion’нинг ўртача фойдаланилгани учун $27,5 минг (сентябрда $29,7 минг эди), янгиcининг нархи эса $29 минг (сентябрда $29,3 минг) қилиб белгиланган.
Босиб ўтган масофаси ҳамда ишлаб чиқарилган йили бўйича
2023–2024-йилларда ишлаб чиқарилган ва босиб ўтган масофаси 20 минг кмгача бўлган автомобиллар – кам фойдаланилган, ушбу йилларда ишлаб чиқарилган ва босиб ўтган масофаси 20 мингдан 50 минггача бўлса – ўртача фойдаланилган.
Шунингдек, ушбу йилларда ишлаб чиқарилган ва босиб ўтган масофаси 50 мингдан кўп бўлган, 2021–2022-йилларда ишлаб чиқарилган ва 40 мингдан ортиқ масофа босиб ўтган, 2020-йилда ишлаб чиқарилган барча автомобиллар кўп фойдаланилган автомобиллар рўйхатига киритилган.
«Автомобиллар нархини таҳлил қилишда маълумотлар olx.uz платформасидан веб скрепинг (web scraping) орқали тўпланди», – дейилади хабарда.
