Одатда қайсидур вилоят ёки туманга янги ҳоким тайинланса унинг аввал қаерда ишлаганига қараб фаолияти баҳоланади. Масалан, собиқ Самарқанд вилоят ҳокими Эркинжон Турдимов ҳозирда Сирдарё вилоят ҳокими этиб тайинланган. Унинг Самарқанддаги фаолиятини жамоатчилик яхши фикр билан эслайди. Сирдарёга ҳоким этиб тайинланганда, энди Сирдарёда ҳам яхши ўзгаришлар бўлади деб хаёлидан ўтказмаган одам бўлмаса керак.
Худди шундай бошқа ҳокимликларда ҳам янги ҳоким кимлигини эшитгач албатта унинг олдинги фаолияти, қайси лавозимда ишлаганини одамлар ўзи учун қисқача таҳлил қилади. Агар янги ҳоким куч тузилмалари тизимидан чиққан бўлсачи? Тизимдан чиққан лавозим эгаларида тартиб интизом кучли бўлсада, жамоатчиликда уларнинг кейинг фаолияти олдидан катта сўроқ пайдо бўлади. Ҳарҳолда прокурор ва ҳокимнинг вазифалари бир бирига ўхшамайди. Ogoh.uz ушбу куч тузилмаларидан чиққан ҳокимлар билан таништиради.
Қосимов Улуғбек Бердиқулович – Сурхондарё вилоят ҳокими
Улуғбек Қосимов ушбу лавозимга 2023 йилда келган. Фаолиятини 2005-2006 йилда Сурхондарё вилояти Денов туман прокуратурасида иш ўрганувчи бўлиб бошлаган. 2016- йилгача у ушбу тизимда ишлаган ва 2017 йилда Музработ тумани ҳокими лавозимига тайинланган. Ундан кейин ҳам ҳозирги лавозимгача Сурхондарё, Фарғона ва Тошкент шаҳар прокурорлари лавозимида ишлаган.
Азимов Муротжон Бердиалиевич – Қашқадарё вилоят ҳокими
Муротжон Азимов ушбу лавзоимга 2021 йилда келган. Фаолиятини 1998-1999 йилларда Қарши ншаҳар прокуратурасида иш ўрганувчи бўлиб бошлаган. У Тошкент давлат юридик университетида таҳсил олган, мутахасисслиги ҳуқуқшунос. Фаолияти давомида асосан терговчи ёрдамчиси ва терговчи лавозимларида ишлаган.
Азизхон Умархонов – Тошкент шаҳар Олмзаор туман ҳокими
Азизхон Умархонов ушбу лавозимга 2021 йилда келган. У 2000 йилда ИИВ академиясини тамомлаган ва шу йиллар давомида тизимда самарали фаолият юритган. Ҳокимликка тайинлангунга қадар Ички ишлар вазирлиги Жамоат тартибини сақлаш бош бошқармаси бошлиғи лавозимида ишлаб келган.
Нилуфар Аллабергенова – Тошкент шаҳар Яккасарой туман ҳокими
Нилуфар Аллабергенова Тошкент шаҳар туманлар орасидаги ягона аёл ҳоким ҳисобланади. У ушбу лавозимга 2023 йилда келган. 1995 йилда Тошкент давлат юридик институтини тамомлаган. Қатор масъулиятли вазифаларда, шу жумладан, турли йилларда Яшнобод, Чилонзор ва Мирзо Улуғбек туманларида прокурор ўринбосари лавозимларида ишлаган.
Муҳаммадисломиддин Аҳмаджонов – Андижон вилояти Улуғнор тумани ҳокими
Муҳаммадисломиддин Аҳмаджонов ушбу лавозимга 2021 йилда келган. 2000-йилда Тошкент давлат юридик институтини, 2012-йилда Ўзбекистон Республикаси Бош прокуратурасининг Олий ўқув курсларини тамомлаган. Иш фаолиятини Тошкент шаҳар ҳокимлиги Адлия бошқармаси катта назоратчилигидан бошлаган Аҳмаджонов Асака шаҳар коммунал фойдаланиш бошқармаси ҳуқуқшуноси, Избоскан туман прокуратураси терговчиси, вилоят прокуратураси иқтисодий жиноятчилик ва коррупсияга қарши кураш бўлими алоҳида муҳим ишлар бўйича терговчиси, судларда жиноят ишлари кўрилишида прокурор ваколатини таъминлаш бўлими бошлиғи, Марҳамат ва Тўрақўрғон туманлари прокурори лавозимларида фаолият кўрсатган. 2020-йилдан 2021 йилгача Улуғнор тумани прокурори вазифасида ишлаган.
Умиджон Барноев – Бухоро вилояти Ромитон туман ҳокими
Умиджон Барноев ушбу лавозимга 2021 йилда келган. Меҳнат фаолиятини 1998 йилда Бухоро вилояти Адлия бошқармасида суд ижрочиси сифатида бошлаган. Маълумоти бўйича мутахассислиги — муҳандис-механик, ҳуқуқшунос ҳисобланади.
Шамсиддин Турдалиев – Фарғона вилояти Олтиариқ туман ҳокими
Шамсиддин Турдалиев ушбу лавозимга 2022 йилда келган. Лавозимга қадар у Риштон тумани прокурори лавозимида фаолият юритган.
Сайидбаҳром Сайидмусаев – Фарғона вилояти Сўх туман ҳокими
Сайидбаҳром Сайидмусаев ушбу лавозимга 2020 йилда келган. У 2019 йилда ушбу туман ички ишлар бўлими бошлиғи вазифасида ишлаган. Фарғона давлат университети, ИИВ академиясини тамомлаган. Қувасой шаҳар ИИБ, Бешариқ тумани ИББ, Қўқон шаҳар ИИБ бошлиғи ҳамда вилоят ИИБ жиноят қидирув бошқармаси бошлиғининг биринчи ўринбосари вазифасида ишлаган
Фаррух Холиқов — Сурхондарё вилояти Қумқўргон туман ҳокими
Фаррух Холиқов ушбу лавозимга 2025 йилда келган. У 2009 йил Тошкент давлат юридик институтини, 2016 йил Бош прокуратура олий ўқув курсини ҳуқуқшунослик мутахассислиги бўйича тамомлаган. Меҳнат фаолияти давомида прокуратура органларида турли лавозимларда, жумладан, Узун ва Шўрчи туманлари прокурори сифатида хизмат қилган. Тайинловга қадар Денов тумани прокурори лавозимида фаолият юритиб келаётган эди.
Шерхон Алламуротов – Сурхондарё вилоятининг Қизириқ тумани ҳокими
Шерхон Алламуротов ушбу лавозимга 2025 йилда келган. Фаолияти давомида ИИОда турли вазифаларда, хусусан, вилоят ИИБда бўлим бошлиғи, Жарқўрғон тумани ИИБ бошлиғи лавозимларида меҳнат қилган. Тайинловга қадар у 2023-йилдан буён Қизириқ тумани Ички ишлар бўлими бошлиғи вазифасида фаолият юритган.
Усмонов Сирожиддин Хайруллаевич – Самарқанд туман ҳокими
Сирожиддин Усмонов ушбу лавозимга 2022 йилда келган. Тайинловга қадар Самарқанд вилояти прокурорининг ўринбосари лавозимида фаолият олиб борган.
